90-жылдары эл арасында популярдуу болгон «I like to move it» ырынын автору, америкалык диджей жана продюсер Эрик Морилло көз жумду. Анын сөөгү Майами-Бич шаарындагы үйүнөн табылганын жергиликтүү WPLG телеканалы полицияга таянып 1-сентябрда кабарлады.
Өлүмдүн чоо-жайы маалым эмес. Күбөлөрдүн айтымында, полиция далил зат катары бир канча мүшөктө буюмдарды алып кеткен.
Эрик Морилло быйыл августтун башында зордуктоо үчүн шектүү катары кармалып, күрөөнүн эсебинен бошотулган. 4-сентябрда алгачкы сот отуруму болмок.
49 жашында көз жумган артисттин жогоруда аталган ыры убагында хит-параддарда алдыңкы орундардан түшпөй турган.
Морилло абройлуу «DJ Awards» сыйлыгына алты жолу татыктуу болгон. Үч жолу «Эң мыкты эл аралык диджей», үч жолу «Мыкты диджей» наамын алган.