Борбордук шайлоо комиссиясынын (БШК) берген маалыматы боюнча, Ош облусунда 506, Ош шаарында 76 шайлоо участогу ачылды. 29-августка карата Ош облусунда 703 944, Ош шаарында шайлоо укугу бар 147 557 шайлоочу катталды.
Бул тууралуу 28-августта Боршайком Жогорку Кеңештин депутаттарын шайлоого даярдык боюнча Ош облусунда өткөргөн көчмө жыйынында белгилүү болду.
БШКнын жана республикалык штабдын мүчөлөрү Ош шаарындагы, Ош облусунун Кара-Суу жана Араван райондорундагы шайлоо участокторунун даярдыгын көрүштү.
Кыргызстандын 120 мандаттуу Жогорку Кеңешинин депутаттарын шайлоо 4-октябрда өтөт.
БШК 24-августта партиялардан тийиштүү документтерди кабыл алууну жыйынтыктап, 17 партия эрежелерди аткарганы расмий кабарланган. Бирок документ тапшырууда мыйзам бузган деген негиз менен «Кыргызстан» партиясынын документтери 25-августта артка кайтарылган.
«Кыргызстан» БШКнын чечимине каршы сотко кайрылган. Бишкектин административдик соту 27-августта партиянын арызын канааттандырган.
Бул чечимге каршы болгон БШК Жогорку сотко арызданды. Боршайкомдун арызы 1-сентябрда каралат. (BTo)