Пакистандын бийлиги Ооганстан менен чек арасынан анча алыс эмес Түштүк Вазиристан аймагында уруулар байырлаган жердеги кол салууда бери дегенде үч жоокер набыт болгонун билдирди. Өлкөнүн аскер жетекчилери окуя 30-августта тинтүү-чалгындоо жүрүп жатканда болгонун, дагы төрт жоокер жарадар экенин маалымдашты. Аймактык полиция башчы Шаукат Алинин эсебинде, кандуу окуяда бери дегенде төрт адам өлдү.
Кол салууну Пакистанда ишмердигине тыюу салынган «Техрик-э-Талибан» согушкер тобу уюштурганын мойнуна алды жана алар чабуулда 11 аскерди жок кылышканын билдиришти.
Түштүк Вазиристан Пакистандын Хайбер-Пахтунхва провинциясында жайгашкан жана жоочулар, куралдуу топтор байырлаган аймак катары белгилүү. Пакистан бийлиги маал-маалы менен аймакты жоочулардан арылтуу операциясын жүргүзүп турат.