Бишкек шаарынын мэриясынын Санитардык-экологиялык инспекциясы соңку 10 күндө санитардык талаптарды бузуп, массалык иш-чараларды өткөргөн ишкерлерге 80 миң сомго 20 протокол түздү. Бул тууралуу мэриянын басма сөз кызматы билдирди.
Мекеме жакында эле Дэн Сяопин көчөсүндө жайгашкан «Нур-Суфра» тойканасынын администрациясы санитардык эрежелерди сактабай куран окутуу өткөрүп жатканы аныкталганын кабарлады.
Дем алыш күндөрү ушундай эле тартип бузуу «Улуу-Тоо» чайханасында, «Главпивтрест» кафесинде да аныкталды. Андан тышкары компьютердик жана бильярд клубдарында да эреже сакталбаган учурлар катталды.
Коронавируска байланыштуу Кыргызстандагы эпидемиологиялык абалга байланыштуу өлкөдө көп адам катышкан массалык иш-чараларды, той-аштарды өткөрүүгө чектөөлөр киргизилген.
11-августка карата Кыргызстанда COVID-19 илдети 40 455 адамга жукту, анын ичинен 32 764ү айыкты жана 1 478 киши каза болду. (BTo)