Бишкектин Биринчи май райондук соту өзбекстандык журналист Бобомурод Абдуллаевди 8-сентябрга чейин камакта калтыруу тууралуу чечим чыгарды. Ал Улуттук коопсуздук боюнча мамлекеттик комитеттин (УКМК) тергөө абагында кармалат.
Журналисттин адвокаты Тимур Султанов сот чечими менен макул эмес экенин «Азаттыкка» билдирди:
«Биз, адвокаттар, соттун чечимин мыйзамсыз жана негизсиз деп эсептейбиз. Анткени Жазык-процессуалдык кодекстин нормалары бузулду. Ошондуктан Бишкек шаардык сотуна апелляциялык арыз менен кайрылабыз».
Биринчи май райондук соту бүгүн, 10-августта Бобомурод Абдуллаевдин бөгөт чарасын жабык карады. Сотко кирердин алдында Абдуллаев журналисттерге өзү мыйзамсыз өтүнүч менен кармалганын жана күнөөсүз экенин билдирди.
УКМКнын атайын өкүлү Рахат Сулайманов издөөдө жүргөн Бобомурод Абдуллаев 8-августта Өзбекстандын өтүнүчү менен кармалганын «Азаттыкка» ырастады.
Журналисттин дагы бир адвокаты Тимур Карабаев Өзбекстандын укук коргоо органдары аны Жазык кодексинин 158-беренеси («Өзбекстан Республикасынын президентине зыян келтирүү»), 159-беренеси («Өзбекстан Республикасынын конституциялык түзүлүшүнө зыян келтирүү») менен айыптап жатканын билдирди.
Интернетте «Усман Хакназаров» деген ат менен таанымал Бобомурод Абдуллаевди атайын кызмат 2017-жылы 27-сентябрда «Өзбекстандагы конституциялык түзүмдү өзгөртүүгө чакырган макалаларды жарыялаган» деген шек менен Ташкентте кармаган. 2018-жылы май айында Ташкент шаардык соту аны шарттуу түрдө бир жарым жылга кесип, сот залынан бошоткон. Көп өтпөй журналист артынан аңдуу жүрүп жатканын соцтармактардагы баракчасында билдирген.
Бобомурод Абдуллаев Европада жүргөн жеринен Американын Борбор Азиядагы университетинин чакыруусу менен Бишкекке төрт айлык окууга келген. Коронавирус пандемиясына байланыштуу чек аралар жабылып, кайра кете албай калган. 9-августта аны Кыргызстандын УКМКсынын кызматкерлери кармап кетишкен. (AiB/ZKo)