16-июлда Борбор Азия мамлекеттеринин жана Кытайдын тышкы иштер министрлери пандемия менен күрөшүү жана экономикалык алаканы талкуулаган видеоконференцияга чогулушту. Ага Кыргызстандан тышкы иштер министри Чыңгыз Айдарбеков катышты. Бул тууралуу Тышкы иштер министрлигинин басма сөз кызматы маалымдады.
Онлайн жолугушууда COVID-19 илдетин жайылтууну токтотуу, пандемиянын экономикалык кесепеттерин калыбына келтирүү, өз ара соода-сатык алака, насыялык кызматташуу боюнча талкуулашты. Дипломаттар терроризм, экстремизм менен күрөшүүдө кызматташтыкты бекемдөө зарыл экенин белгилеп, Ооганстанда тынчтык орнотуу маселелери боюнча пикир алмашты. Онлайн жыйын Кытай тараптын демилгеси менен уюштурулду.
Кыргызстандын тышкы иштер министри Чыңгыз Айдарбеков пандемиянын экономикалык чыгымдарын жөнгө салуу үчүн соода алаканы жакшыртуу жана финансы-кредиттик кызматташтыкты өнүктүрүү маанилүү экенин белгиледи.
Маалыматта ошондой эле министр Айдарбеков Кытай-Кыргызстан-Өзбекстан темир жолунун курулушу боюнча маселе көтөргөнү айтылды.
Борбор Азия мамлекеттерине Кыргызстан, Казакстан, Өзбекстан, Тажикстан жана Түркмөнстан кирет. Бул өлкөлөрдө эпидемиологиялык кырдаал курч болуп турат. (TSh)