Ош шаарындагы борбордук базар, «Келечек» базары 22-июнь күнү жабылып, дезинфекциялоо иштери жүргүзүлөт. Бул тууралуу Ош шаардык мэриясынын басма сөз кызматы билдирди.
Мекеменин маалыматында, базарларда беткапсыз жүргөн адамдардын саны көбөйүп, кайдыгерлик орун алууда. Ошондуктан санитардык-эпидемиологиялык талаптарды сактоо боюнча түшүндүрүү иштери жүргүзүлүп, текшерилип жатат.
Шаардык бийлик жарандарды санитардык-гигиеналык талаптарды сактоого чакырды.
Кыргызстанда 19-июнга карата маалымат боюнча бир суткада 132 адамдан коронавирус аныкталды. Бул пандемия башталгандан бери Кыргызстанда бир суткада вирус аныкталган эң жогорку көрсөткүч.
Муну менен республикада COVID-19га чалдыккандардын жалпы саны 2789 адамды түздү. 1961 адам сакайып кетти. 32 адам көз жумду. (DU)