Коронавирус инфекциясынын күчөгөнү менен Бишкекке чектөөлөр азырынча киргизилбейт. Бул маалыматты өкмөт башчылыкка талапкер Кубатбек Боронов бүгүн, 16-июнда журналисттерге билдирди. Анын айтуусунда, Кыргызстанда коронавирустун күч алышы алдын-ала болжолдонгондой эле болууда:
«Бизде үч түрдүү божомол болгон. Азыр биз орточо оор баскычына келдик, кырдаал көзөмөлдө. Бирок Бишкекте вирустун жайылышы күчөгөнү тынчсыздандырууда. Ошентсе да азырынча шаарда кандайдыр бир чектөөлөрдү киргизүү планда жок», - деди Кубатбек Боронов.
Кыргызстанда акыркы күндөрү коронавирус жуктуруп катталгандар көбөйүүдө.
14-июнда 78 адамдан табылса, 15-июнда 87 адамга чыккан. 16-июнда коронавирус жуктуруп алган 100 адам жаңы аныкталды. Бул пандемия башталгандан берки эң жогорку көрсөткүч. Оору жуктургандардын басымдуу бөлүгү Бишкектен.
Президент Сооронбай Жээнбеков да 15-июнда премьер-министрдин милдетин аткаруучу Кубатбек Бороновду кабыл алып, “Бишкек оорунун очогуна айланып жатканын” айткан. (ZKo)