29-апрелге карата Кыргызстанда коронавирус жуккан дагы 21 адам катталды. Бул тууралуу Саламаттык сактоо министрлигинин өкүлү Айнура Акматова билдирди.
Алардын 13ү Бишкек шаарында. Ош облусунда бирөө, Нарын облусунда алтоо, Баткен облусунда бирөө.
Соңку бир сутка ичинде 21 бейтап айыгып чыкты.
Ошентип, бүгүнкү күнгө карата илдет жуккандардын жалпы саны 729 адам болду, алардын сегизи каза тапты, 437 бейтап сакайып кетти.
Коронавируска байланыштуу 30-апрелге чейин Бишкек, Ош, Жалал-Абад жана Нарын шаарларына, Ош облусунун Ноокат жана Кара-Суу райондоруна, Жалал-Абад облусунун Сузак районуна жана Нарын облусунун Ат-Башы районунун аймагына өзгөчө абал киргизилген.
28-апрелде Коопсуздук кеңешинин чечими менен өзгөчө абал Бишкек, Ош, Жалал-Абад шаарларында жана Ат-Башы районунда 10-майга чейин, ал эми калган аймактарда өзгөчө кырдаал режими калтырылды.
Кыргызстандык адистер өлкөдө коронавирус жуккандардын саны эң көп каттала турган мөөнөт 20-24-апрель болот деп болжолдогон. (RK)