Кыргызстанда коронавируска өз алдынча текшерилүү мүмкүнчүлүгү түзүлдү. Саламаттык сактоо министринин орун басары Нурболот Үсөнбаев 22-апрелде онлайн брифингде Бишкекте Бонецкий лабораториясына кайрылса болорун билдирди.
«Азаттык» лаборатория менен байланышып, анализ тапшыруу шарттарын билди. Кызматкерлеринин айтымында, азырынча бул багытта бир лаборатория иштей баштады. Анализдин баасы 2 миң сомдун тегерегинде, жыйынтыгы бир күндөн кийин чыгат.
22-апрелге карата илдет жуккандардын жалпы саны Кыргызстанда 612 кишиге жетти. Алардын жетөө каза тапты, 254 бейтап айыгып чыкты.
Буга чейин коронавирусту аныктоо мамлекеттик атайын лабораторияларда гана жүргүзүлүп жаткан. (RK)