Мындан ары мас абалында коменданттык сааттын талаптарын бузган адамдар Жоруктар кодексинин негизинде камалат. Бул тууралуу Ош аймагынын коменданты Малик Нурдинов 16-апрелде брифингде билдирди:
«Ичип алып машине айдап кармалса, ал үчүн мыйзам чегинде айып төлөйт. Андан тышкары коменданттык сааттын талабын бузганы үчүн дагы үч миң сом айып төлөйт. Бул үй-бүлөлүк бюджетине деле зыян. Ошондуктан, биз аймакта ичкилик сатпоо тууралуу демилге көтөрүп, убактылуу чектөө киргизгенбиз. Бирок айрым соодагерлер ага карабай, тескерисинче катып сатып жатышат», - деди Малик Нурдинов.
Ош аймагынын коменданты 13-апрелдеги буйругу менен Ош шаарынын, Ноокат, Кара-Суу райондорунун аймактарында спирт ичимдиктерин сатууга убактылуу тыюу салган.
Коронавирустун жайылышынын алдын алуу максатында 22-марттан тартып өлкөдө өзгөчө кырдаал киргизилген. 25-марттан тартып оору көп катталган Бишкек, Жалал-Абад, Ош шаарларында, Кара-Суу, Ноокат жана Сузак райондорунда өзгөчө абал жарыяланган. 15-апрелде өзгөчө абал 30-апрелге чейин узартылды. Президенттин 14-апрелдеги жарлыгы менен Нарын шаарына жана Ат-Башы районуна да өзгөчө абал киргизилип, аймакта өзүнчө комендатура түзүлдү. (ZKo)