Кыргызстанда коронавируска байланыштуу түзүлгөн өзгөчө абалда эреже бузган адамдарды жазалоо чаралары күчөтүлдү. Бул тууралуу өкмөттүн басма сөз кызматы кабарлады.
Биринчи вице-премьер-министр Кубатбек Боронов Коронавируска каршы ыкчам штабдын жыйынын өткөрүп, жаңы чаралар тууралуу элге маалымат жеткирүүнү талап кылды.
Карантинге баш ийбегендерге 30-60 миң сом, дары-дармекти кымбаттатып саткандарга 10-28 миң сом, документсиз жана өткөрмөсүз көчөгө чыккандарга 3 миң сом айыппул салынат.
Такталбаган маалымат таратып, коомдук тартипти жана элдин тынчтыгын бузгандар 5,5-17 миң сом айыппул төлөшү керек болот.
Азык-түлүктүн баасын негизсиз жогорулаткандарга 10-28 миң сом өлчөмүндөгү айыппул каралууда.
3-апрелге карата Кыргызстанда коронавирус 130 адамга жукту, алардын бирөө каза тапты. (RK)