23-мартта өзгөчө кырдаалдар министри Замирбек Аскаров чет өлкөдөн келген жарандарды жайгаштырып жаткан Бишкек шаарындагы №1 интернаттагы шарттарды текшерип барган учурда бир топ кемчиликтер бар экени аныкталган. Бул тууралуу республикалык штаб кабарлады.
Штабдын маалыматына караганда, аталган жайдагы таштандылар чыгарылып, муздаткыч, гигиеналык каражаттар менен камсыздалды. Интернатта канча киши жаткырылганы айтылган жок. Буга чейин социалдык тармактарда чет өлкөдөн келген кыргызстандыктар шарты жок имараттарда жашап жатканы тууралуу кабарлар тараган.
Соңку эки күн ичинде Кыргызстан чет мамлекеттерге эс алганы кетип, кайта албай жаткан 137 жаранын алып келди. 22-23-мартта Кыргызстандын Туроператорлор ассоциациясы казак тараптын жардамы менен Шарм-Эл-Шейх (Египет) шаарынан 126 жана Баңкоктон (Таиланд) 11 туристти алып келди.
Казакстандын Алматы эл аралык аэропортуна учуп келген кыргызстандыктар атайын транспорт менен дарыгерлердин коштоосунда Бишкекке жеткирилди. (TSh)