Кыргызстан менен Казакстандын ортосундагы «Ак-Жол автожол» заманбап көзөмөл-өткөрүү жайын жаңылоо иштери январдын аягында башталат.
6-январда кыргыз өкмөт башчысы Мухаммедкалый Абылгазиев аталган жайды модернизациялоо жана реконструкциялоо боюнча кеңешме өткөрдү.
Расмий маалыматта премьер-министр курулуш тез жана өз мөөнөтүндө бүткөрүүнү тапшырганы айтылганы менен, ал качан аягына чыгары тууралуу кабар берилген жок.
Өкмөт оңдоп-түзөө иштеринен соң көзөмөл-өткөрүү жайынын заманбап талаптарга жооп берген иштөө мүмкүнчүлүктөрү үч эсе жогорулайт деп убада берүүдө.
Реконструкциялоо иштерине байланыштуу кыргыз-казак чек арасындагы «Ак-Жол» – «Кордай» көзөмөл-өткөрмө бекеттери жабылары декабрда кабарланган.
Эки өлкө ортосунда 11 автоунаа өткөрүү пункту бар. Алардын бешөө көп тараптуу, алтоо эки тараптуу бекеттер.