Бишкектин Биринчи май райондук соту 200 миң доллар пара алган деген шек менен кармалган Башкы прокуратуранын Мамлекеттик айыптоону колдоо башкармалыгынын мурдагы башчысы Уланбек Чалбаевди Жазык кодексинин 327-беренеси («Пара алууга же коммерциялык сатып алууга түртүү») (ред: 2017-жылдын 2-февралындагы Жазык кодексине ылайык) боюнча күнөөлүү деп таап, беш жылга эркинен ажыратты.
Мындай чечимди судья 19-ноябрда чыгарганын райондук соттун басма сөз кызматы билдирди.
Маалыматка караганда, андан тышкары бул иште аты аталган Жогорку Кеңештин мурдагы депутаты Карганбек Самаковдун уулу Кубанычбек Самаков «Пара берүү» (ред: 1997-жылдагы Жазык кодекси боюнча) беренеси менен күнөөлүү деп табылып, мамлекетке 2 млн. сом төлөп берүүгө милдеттендирилди. Ушул эле берене боюнча Жаныбек Самаковго да айып коюлган. Сот анын ишинде кылмыштын белгилери жок деген негизде актады.
Айнура Кайнаева бул иште «пара алууда ортомчулук кылган» (ред: 1997-жылдагы Жазык кодекси боюнча) деп табылып, мамлекетке 100 миң сом төлөп берүүгө милдеттендирилди.
Эрлан Кыдыралиевге «Кылмышты жаап-жашыргандыгы» (ред: 1997-жылдагы Жазык кодекси боюнча) үчүн 220 миң сом айып пул салынды. Ушул эле берене боюнча Максат Тукинов да айыптуу деп табылып, ага да 220 миң сом айып салынды.
Соттун өкүмү күчүнө киргенден кийин далил зат катары алынган 199 миң 500 доллар жана «Samsung Galaxy S6 edge» уюк телефону мамлекеттин пайдасына чегерилди.
УКМК 2018-жылы 16-апрелде, Башкы прокуратуранын мамлекеттик айыптоону колдоо башкармалыгынын башчысы Чалбаевдин иш бөлмөсүндө ыкчам тинтүү иштери жүрүп, анда табылган баштыктан 200 миң доллар чыкканын жарыялаган.
УКМК ошол кезде бул акчанын таржымалын Бишкек шаардык сотунда каралып жаткан, парламенттин мурдагы депутаты Карганбек Самаковдун кылмыш ишин анын пайдасына оң жагына чечип берүү максатында берилген пара катары сыпаттаган. (BTo)