«Бүтүн Кыргызстан» партиясынын лидери Адахан Мадумаров Баткен облусунун мурдагы губернатору Мамат Айбалаевди жана бийлик өкүлдөрүн теледебатка чакырды. Бул тууралуу Мадумаров «Азаттыктын» «Ыңгайсыз суроолор» телеберүүсүндө билдирди. Анын айтымында, 2009-жылы Коопсуздук кеңешинин катчысы болуп турган учурда кыргыз-тажик чек арасына байланыштуу протоколго туура кол коюлган.
Мадумаров бул протоколдун уландысы катары 2009-жылы декабрда кол коюлган документти ачыкка чыгарууга чакырды.
Ал эми телекөрсөтүүгө катышкан Жогорку Кеңештин вице-спикери Мирлан Бакиров Мадумаров кол койгон протокол боюнча абдан көп суроо болуп жатканын белгилеп, ал документти Жогорку Кеңеш тааныбай турганын билдирди.
Аталган протоколдун мазмунунда Ош-Баткен-Исфана жолун оңдоп, ал жерге көпүрө салыш үчүн дарыяны жээктей кеткен 275 метр узундуктагы 5 гектар жер участогун Кыргызстанга алуу маселеси макулдашылган.
Баткен облусунун мурдагы губернатору Мамат Айбалаев ал жолду алып өтүш үчүн тажик тарап менен 10 жыл мурун түзүлгөн протокол талаш-тартышка негиз болгонун, Жака-Өрүккө чейинки 275 метр жерди ижарага алуу боюнча Мадумаров тиешелүү протоколго кол коюп салганын айткан эле. (BkA)