Орусиянын, Украинанын, Германиянын жана Франциянын лидерлери сентябрда Украинанын чыгышындагы чатакты токтотуу маселеси боюнча сүйлөшүү өткөрөт. Бул тууралуу Франциянын президенти Эммануэл Макрон 26-августта Биаррице шаарында «Чоң жетинин» саммити аяктап жатканда айтты.
- Биз жакшы саммит өткөрүүгө мүмкүнчүлүктөр бар деп эсептейбиз, - деди Макрон. Бирок ал «Норманд форматы» деген ат менен таанылып калган мындай төрт тараптуу сүйлөшүүнүн так датасын айткан жок.
Украинанын чыгыш тарабында орусиячыл жикчилдер менен өкмөт күчтөрүнүн ортосундагы тиреш 2014-жылы, Орусия Крымды аннексиялап алгандан бери уланып келатат. Андан бери 13 миңден ашуун адам мерт болду.
Крымдын аннексиясына байланыштуу Орусия «Чоң жетинин» катарынан чыгарылган.