Улуттук коопсуздук боюнча мамлекеттик комитет (УКМК) мурдагы президент Алмазбек Атамбаевди кармоо операциясы учурунда жараат алган аскерлерге кымбат баалуу дары-дармектер керек деген маалымат чындыкка дал келбесин кабарлады. Маалыматка ылайык, Кой-Таштагы окуяда жаракат алган бардык кызматкерлерге ар тараптуу медициналык жардам көрсөтүлүүдө жана керектүү дары-дармектер менен толук камсыздалган. Буга байланыштуу УКМК жарандарды жараат алган жоокерлер үчүн акча чогултууга багытталган шектүү акцияларга катышуудан баш тартууга чакырды. Бул тууралуу комитеттин басма сөз кызматынан билдиришти.
7-августта мурдагы президент Алмазбек Атамбаевди кармоо операция учурунда жалпысынан 12 аскер жаракат алып ооруканага түшкөн. Ал эми операцияны жетектеп барган подполковник Үсөн Ниязбеков ок жеп каза болду. Мындан сырткары Чүй облустук милициясынын башчысы Самат Курманкулов жаракат алып, учурда оор абалда ооруканада жатат. (BkA)