Ысык-Көл районунун Бает айылынын 37 жана 59 жаштагы эки тургуну аракка ууланып каза болду. Жергиликтүү бийликтин маалыматы боюнча, экөө чогуу отуруп спирт ичимдигин ичип, үйлөрүнө кеткен. Эртең менен ойгонбой калган. Бул маалыматты облустук милициянын басма сөз кызматы да ырастады. Окуя 6-июлда болгон.
Маркумдар жерге берилди, алардын биринин туугандары медициналык экспертизадан баш тартышкан. Ал эми экинчи адамдын үй-бүлөсү сөөктү экспертизага берген. Баштапкы маалыматтарга ылайык, бул эки жаран алкоголдук интоксикациядан улам ууланып каза тапкан. (KS)