Бишкектеги «Медиа Форум» имаратынын алдында бүгүн «эски элитага каршы» тынчтык митинг өтөт. Бул тууралуу митингди уюштуруп жаткан мурдагы президент Алмазбек Атамбаевдин тарапкерлери билдиришти.
Алардын маалыматына караганда, митингде «Эски элита кетип, жаңы элдик лидерлер келсин!» деген чакырык бийликке ташталат. Ага Атамбаев өзү да катышарын билдирген.
Бийлик Атамбаев жана анын тарапкерлеринин митинг тууралуу маалыматына расмий комментарий бере элек.
27-июнда Жогорку Кеңештин Атамбаевдин «экс-президент» макамын алып, кол тийбестиктен ажыраткан чечими укук коргоо органдарына аны кылмыш жообуна тартууга мүмкүнчүлүк берет. Мурдагы президенттин ондогон тарапкерлери 22-июндан бери Кой-Таш айылындагы анын үйүндө топтолуп турушат. (NT)