Чүйдүн Төмөнкү Орок айылындагы окуядан жабыркаган эки бала Бишкектин №3 балдар ооруканасында дарыланып жатышат. Бул тууралуу Саламаттык сактоо министрлиги кабарлады.
Мекеменин маалыматына караганда, бир бала ыкчам терапия палатасында, экинчиси нейрохирургия бөлүмүндө. Экөөнүн тең абалын дарыгерлер туруктуу деп баалап жатышат.
Бүгүн, 5-июнда Чүйдүн Төмөнкү Орок айылында мечитте Айт намаздан кийин чыгып баратып үч өспүрүм бала уруша кетип, мушташ чыккан.
Факт Кылмыштар менен жоруктардын бирдиктүү реестрине 266-берене («Ээнбаштык») менен катталды.
«Эки адам дароо убактылуу кармоочу жайга киргизилген, бирок жабыркаган баланын туугандары нааразылык билдирип, мыйзамга дал келбеген иш-аракеттерди кылышкан» деп билдирди милиция өкүлү.
15 үйдүн терезеси сынганы да кабарланды. Бир жерде жыйылып турган чөп өрттөлгөн. 25-30 киши Сокулук милициясына жеткирилди.
Окуя болгон жерге ички иштер министри Кашкар Жунушалиев барды.
Алгач бир бала жабыркады деген маалымат тараган. (AiN)