Жогорку Кеңештин депутаты Исхак Масалиев Алмаз Мамбетовдун Мамлекеттик каттоо кызматына жетекчи болуп дайындалышын сынга алып, буга чейин ага байланыштуу аудио жазуу тараганын айтты. Премьер-министр Мухаммедкалый Абылгазиев депутатка жооп берип жатып Мамбетовго «ыплас сөздөрдү азыраак колдон» деп эскерткенин билдирди.
- Кесиптешибиз Балыкчы шаарында санариптештирүү боюнча жакшы кадамдарды жасады. Анын ичинен элге мамлекеттик кызматты жеткирүү боюнча. Эми Интернетте жүргөн боюнча ага «жанагындай сөздөрдү азыраак колдон» деп айттым, - деди Абылгазиев.
Алмаз Мамбетов Мамлекеттик каттоо кызматынын төрагасы болуп 19-апрелде дайындалган.
Мамбетов коомчулукка Балыкчынын орой мэри катары таанылган. 2017-жылы Балыкчынын мурдагы башчысы Сатыбек Шамшудиновди оозго алгыс сөздөр менен сөгүп, коркутуп жаткан аудио жазуу Интернетке тараган. Шамшудинов телефон сүйлөшүүнү өзү жаздырып алганын, маектеши Мамбетов экенин ырастаган. (BTo)