НАТОго кирген 29 мамлекет Македония менен Грекиянын ортосундагы алакалар бир нукка түшкөн соң бул өлкө менен тарыхый келишимге жетишүүнүн алдында турат.
Македониянын тышкы иштер министри Никола Димитров Брюсселдеги салтанаттуу иш-чарага катышып, 29 мүчө мамлекеттин өкүлдөрү менен келишимге кол коёт. Бул тууралуу Түндүк-Атлантикалык Альянстын Интернеттеги сайтында жарыяланды.
НАТОнун баш катчысы Йенс Столтенберг бул келишим Македонияны НАТОнун 30-мүчөсү кылып кабыл алуудагы маанилүү документ экенин өткөн аптада айткан.
2-февралда Столтенберг “Твиттер” баракчасына “6-февралда биз тарыхты жазабыз” деп жазган.
Македония менен Греция былтыр келишимге келип, македондор өз өлкөсүнүн аталышын Түндүк Македония Республикасы деп өзгөрткөн.
25-январда Грекиянын парламенти кошуна Македония менен мамилелерди жакшыртууга багытталган тарыхый келишимди жактырды.
Былтыр жайында кол коюлган келишим Македонияны НАТОго жана Европа Биримдигине кошулуу максатына жакындатмакчы.