22-январда Бишкек шаарынын Биринчи май райондук соту Бишкек Жылуулук электр борборун (ЖЭБ) оңдоодогу тендерге байланыштуу айыпталуучуларды 6-7 жылга эркинен ажыраткан чечим чыгарган. Бирок соттолуучулар айыптоого жана соттун чечимдерине макул эмес экенин билдиришүүдө. Соттолгондордун бири, “Аймар Энержи” фирмасынын жетекчиси Темирбек Ниязовдун адвокаты Александр Хегай айыпталуучунун күнөөсү аныкталган жок деп эсептейт.
Бишкек ЖЭБинин айланасындагы кылмыш иштеринин бири боюнча соттун алгачкы чечими чыкты. Ага ылайык, «Электр станциялары» ишканасынын жетекчисинин мурдагы биринчи орун басары Бердибек Боркоев жети жыл алты айга, «Аймар Энержи» жоопкерчилиги чектелген коомунун жетекчиси Темирбек Ниязов менен «Электр станциялары» ишканасынын мурдагы техникалык директору Алмаз Жусупбеков жети жылга, «Аймар Энержи» жоопкерчилиги чектелген коомунун уюштуруучусу Канат Деркенбаев алты жылга эркинен ажыратылды. Өкүмдөн кийин Канат Деркенбаевдын бөгөт чарасы өзгөртүлүп, сот залынан камакка алынды. Ал эми башка айыптоочулар буга чейин эле камакка алынган.
Сот айыпталуучуларды Кылмыш-жаза кодексинин 233-беренесинин 2-бөлүмү («Коммерциялык же башка уюмда ыйгарым укуктарын кыянаттык менен пайдалануу), 205-беренесинин 3-бөлүмү («Ишенип берилген мүлктү ыйгарып алуу же коротуу») жана 78-беренеси («Кылмыштардын жыйындысы боюнча бир жаза дайындоо») боюнча күнөөлүү деп тапты. Ошондой эле «Электр станциялары» ишканасынын доо арызы канааттандырылып, соттолгондордон мекеменин пайдасына 6 683 028,75 сом өндүрүү тууралуу чечим кабыл алынды.
Бирок бул иштер ЖЭБди модернизациялоого жана андагы аварияга түз тиешеси жок. Бул 2017-жылдагы жылуулук борборундагы от казандарды оңдоодогу жана ага өткөн тендердеги мыйзамсыздык боюнча козголгон кылмыш иши. (TSh)