АКШ президенти Дональд Трамп Орусиянын мамлекет башчысы Владимир Путин менен "ылайыктуу учурда" жолугарын билдирди. Бул тууралуу Аргентинада "Чоң жыйырманын" саммити маалында "Америка үнү" радиосунун англис кызматынын журналисти суроо бергенде айтты:
- Азыр Путин менен жолуга турган учур эмес. Мен аны менен жолугам, бирок ыңгайы келгенде гана. Мен биздин алакабыз абдан жакшы жана ал уланат деп ойлойм. Орусия жана Кытай менен жакшы мамиледе болушубуз керек деп эсептейм. Андыктан мен Путинге ыңгайы келген учурда жолугам, - деди Трамп.
1-декабрда Дональд Трамп Орусиянын президенти Владимир Путин менен жолукмак. Бирок бир күн мурда АКШнын мамлекет башчысы бул кездешүүдөн баш тарткан. Ал буга Керч кысыгындагы жаңжал, Орусия Украинага кемелерин жана деңиз аскерлерин кайтарып бербей жатканы себеп болгонун айткан.
Кремл жолугушуунун ишке ашпай калганына өкүнөрүн билдирген. Путиндин басма сөз катчысы Дмитрий Песков болбой калган сүйлөшүүнүн ордуна Путин Түркиянын президенти Режеп Тайип Эрдоган менен кезигерин маалымдады.
“Чоң жыйырманын” түзүлгөндүгүнүн он жылдыгына туура келген саммит 30-ноябрда Буэнос-Айресте ачылган. Ачылуу салтанатында Трамп менен Путин кол алышпаганы байкоочулардын көңүлүн бурган.
“Чоң жыйырманын” курамына эң өнүккөн, өнүгүп келе жаткан 19 өлкө жана Европа Биримдиги кирет. Аларга дүйнө экономикасынын жалпы өндүрүшүнүн 90% таандык.
Сиздин браузер HTML5 ыкмасын колдобой жатат.
Трамп: Путинге ыңгайы келгенде гана жолугам