Ош облусунун Кара-Суу районунан жана Ош шаарынын Учар айылынан жоголгон кыздар алты күндөн кийин, 16-августта Бишкек шаарынан табылды.
Бул тууралуу Ош шаардык ички иштер башкармалыгынын криминалдык милиция кызматы “Азаттыкка” кабарлады. Маалыматка караганда, 9-класска көчкөн 14 жаштагы курбулар 10-августта Ош шаарынан жолуккан. Туугандары ошол бойдон алардын дайынын таппай калган. Милиция кыздар Бишкектин “Жал” кичи районунан аман-эсен табылганын кашумчалады. Алардын кайда, эмне кылып жүргөнү тууралуу маалымат айтылган жок.
Буга чейин ушул 13 жана 12 жаштагы эки кыз Бишкектен жоголуп Оштон табылган. Кыздар үй-бүлөсүнө таарынып, Ошко такси менен кетип калганы айтылган. (КЕ)