Тогуз-Тородо алтын ылгоочу фабриканы өрттөөгө шектүү катары кармалган 12 жарандын сегизи Аламүдүн районундагы №50 тергөө абагына которулат. Бул тууралуу акыйкатчы Кубат Оторбаев “Азаттыкка” билдирди. Анын айтымында, кармалгандардын сегизи учурда Бишкек шаардык милициясынын убактылуу кармоочу жайында, калган төртөө №1 тергөө абагында кармалууда.
Оторбаев аларды Жалал-Абадга которуу боюнча сөз болбогонун кошумчалады. Буга чейин кармалгандардын тарапташтары аларды Жалал-Абадга которуу аракети жүрүп жатканын айтышкан.
Акыйкатчы институту кармалгандардын экөө 1999-2000-жылы туулгандар экенин эске салып, алардын мектеп окуучусу экени бышыкталса өсүпурүмдөр колониясына которуу аракети көрүлөрүн билдирди.
11-апрелде Тогуз-Тородо миңден ашык киши катышкан митинг өтүп, акция учурунда алтын ылгоочу фабрика толугу менен өрттөлүп кеткен. Бул боюнча ИИМ Кылмыш-жаза кодексинин 234-беренеси ("Ээнбаштык") жана 174-беренеси ("Бирөөнүн мүлкүн атайын өрттөп жок кылуу") менен кылмыш ишин козгоп, 15 киши кармалган. Бишкектин Биринчи май райондук соту 17-апрелде алардын ичинен үч аялды “өлкөдөн чыкпоо” жөнүндө тилкат менен бошотуп, калган 12 адамды №1 тергөө абагына камакка алган. (UEz)