Бишкекте өтүп жаткан Азия чемпионатында эркин күрөштөн Эламан Догдурбек уулу жана Айбек Усупов коло байге үчүн күч сынашат. Бүгүн, 3-мартта эркин күрөш боюнча беш салмак категориясында байгелер ойнотулуп жатат.
70 килограмм салмакта килемге чыккан Эламан Догдурбек уулу чейрек финалда кытайлык Менгежиган Менгежиганды 9:0 эсебинде жеңди. Жарым финалда өзбекстандык Ихтиёр Наврузовго утулду (2:5). Алдыда коло байге үчүн индиялык Кумар Омпракаш менен таймашат.
97 килограмм салмакта күрөшкөн Айбек Усупов үч беттеш өткөрдү. Алгач тажикстандык Рустам Искандарини 21:8 эсебинде жеңди. Чейрек финалда өзбекстандык Магомед Ибрагимовго 5:0 эсебинде утулду. Өзбек балбаны финалдык таймашка жолдомо алгандыктан Усуповго коло байге үчүн күрөшүүгө жол ача турган жооткотуучу таймашка чыгууга мүмкүнчүлүк пайда болду. Бул беттеште кыргыз балбаны түркмөнстандык Зиямухаммед Сапаровду 11:0 эсебинде жеңди. Алдыда 3-орун үчүн жапониялык Такеши Ямагучи менен күч сынашат.
65 килограмм салмактагылар арасында жооткотуучу беттешке чыккан кыргызстандык Эрназар Акматалиев түндүк кореялык Кукванг Кимге утулуп (8:8) байгесиз калды.
Финалдык таймаштар саат 18:00дө башталат. Мелдештин жүрүшүн КТРК Спорт телеканалы түз алып көрсөтөт.
Күрөш боюнча Азия чемпионаты 27-февралда башталган. 4-мартта аяктайт. (ECh)