КСДП фракциясынын депутаты Ирина Карамушкина Интернетте президент Сооронбай Жээнбековду жана экс-президент Алмазбек Атамбаевди атайын каралоо жүрүп жатканын “Азаттыкка” билдирди. Анын айтымында, социалдык тармактардагы айрым топтордо президент менен экс-президенттин ар-намысына шек келтирген билдирүүлөр жарыяланып жатат.
- Акыркы убактарда президент менен экс-президенттин ар-намысына шек келтирген билдирүүлөр жарыяланып жатат. Буларга чара көрүү боюнча мага бир катар жарандар кайрылды. Мен болсо коопсуздук жана коргонуу комитетинде бул маселени УКМКга жеткирдим. Алар чара көрүлүп жатканын айтышты, - деди Карамушкина.
Ирина Карамушкина мындан сырткары социалдык тармактарда диний радикалдар, улутчулдар конституциялык түзүлүшкө шек келтирип, айрым жарандарды коркутуп-үркүтүп жатканын кошумчалады.
Ирина Карамушкина бул маселени кечээ, 26-декабрда парламенттин Эл аралык иштер, коргоо жана коопсуздук комитетинде көтөргөн. Жыйынга катышкан УКМКнын төрага орун басары Рустам Мамасадыков Интернеттеги чектен ашкан деструктивдүү сайттарды жабуу боюнча иштер жүрүп жатканын айткан. (UEz)