АКШ менен Өзбекстандын президенттери телефондон сүйлөшкөнүн Ак үй да, Ташкент да билдирди.
Ак үй 19-декабрдагы телефон аркылуу сүйлөшүүнүн максатын “аймактык коопсуздукту талкуулап, кызматташтыктын өркүндөтүү мүмкүнчүлүктөрүн иликтөө” деп чечмеледи.
Алар ошондой эле “Өзбекстандын Борбор Азиядагы ролун, анын ичинде Трамптын Түштүк Азия боюнча стратегиясын, АКШнын Ооганстандагы аракеттерине колдоо көрсөтүүнү талкуулашты", деп айтылат Ак үйдүн билдирүүсүндө.
Ак үй маалымдагандай, Трамп сүйлөшүүдө “Өзбекстан сооданы күчөтүп, террор коркунучтарына каршы коопсуздукту жакшыртууга шарт түзө турган реформа жүргүзүүгө аракет кылып жатканын белгилеген”.
Ал эми өзбек президентинин Интернет барагындагы билдирүүдө Трамп Өзбекстандын “ачык жана конструктивдүү тышкы саясатын, аймактагы коңшу өлкөлөр менен кызматташтык жана достук мамилени өнүктүрүү боюнча жигердүү аракеттерин” кубаттаганы көргөзүлгөн.
Президенттер Доналд Трамп менен Шавкат Мирзиёев быйыл эки жолу: май айында Сауд Арабиясындагы саммитте жана сентябрь айында Нью-Йоркто БУУнун Башкы ассамблеясында жолугушкан. (UE)