Кыргызстандык балбан кыз Айсулуу Тыныбекова Украинада эл аралык "Алтын мангуст" сыйлыгынын атайын орденин алды. Сыйлоо аземи 9-декабрда Одесса шаарында өткөнүн Тыныбекованын машыктыруучусу Нурбек Изабеков "Азаттык" радиосуна билдирди. Орден анын дене тарбияга жана спортко кошкон салымы үчүн ыйгарылды.
Тыныбекова Кыргызстанга 11-декабрда келет. Ал 2017-жылы жети турнирге катышып үч алтын, үч күмүш жана бир коло медал утту.
"Алтын мангуст" сыйлыгы 2009-жылы негизделип, алгач украиналыктарга гана тапшырылган. 2012-жылы эл аралык макамга ээ болгон. Аталган сыйлык спортчуларга жана спортко салым кошкондорго берилет.
Нурбек Изабековдун айтымында, буга чейин Кыргызстандын мурдагы ички иштер министри Мелис Турганбаевге да ыйгарылган.