Иран менен Ирактын чек арасында 12-ноябрда кечинде болгон жер титирөөдөн 100дөн ашуун адамдын өмүрү кыйылды. Дагы жүздөгөн киши жарадар болгонун ирандык маалымат булактары кабарлашты.
АКШнын Геологиялык кызматынын эсебинде, зилзаланын күчү 7,3 баллды түздү. Анын очогу Ирактын түндүк-чыгышындагы Халабжа шаарынан 32 чакырым түштүк-батышта болду.
Силкинүү Израилде, Кувейтте жана Түркиянын түштүк-батышында да сезилген.
Иранда 2003-жылы күчү 6,6 баллды түзгөн жер титирөөдөн тарыхый Бам шаары талкаланып, 26 миң адамдын өмүрү кыйылган.