Нарын облусунун Ат-Башы райондук прокуратурасы жергиликтүү жол-эксплуатация мекемесинин кызмат адамдарына кылмыш ишин козгоду. Бул тууралуу Башкы прокуратура тараткан маалыматта айтылат.
Маалыматка караганда, райондук №20 жол-эксплуатация мекемесинин кызмат адамдары Кылмыш кодексинин 304 (кызмат абалынан кыянат пайдалануу) жана 315 (кызматтык жасалмалуулук) беренелери менен айыпталууда. Прокуратура аталган мекеменин кызмат адамдары 2015-2017-жылдарда кызматкерлерге мыйзамсыз кошумча акы которгонун, андан мамлекетке 86 миң 910 сомдук зыян келтирилгенин маалымдады.
Кылмыш иштин материалдары УКМКнын Нарын облустук башкармалыгына өткөрүлүп берилген. (NT)