Гаага шаарындагы Орусия элчилигинин тушунда жайгашкан паркта үч жыл мурда Донбасста болгон учак кырсыгынын курмандыктары эскерилди. 16-июль күнкү иш-чарага кырсыкта мерт кеткендердин туугандары чыкты.
Голландиянын NRC басылмасы кабарлагандай, алар эскерүү отургучун орнотуп, ага англис тилинде "Malaysia Airlines MH17 учагындагы жүргүнчүлөрдүн жана экипаждын элесине арналат. Биз жоопкерчиликти жана ачык-айкындуулукту күтөбүз" деген жазуу илишти.
Амстердам-Куала-Лумпур багытындагы MH17 учагы 2014-жылы 17-июлда Украинанын аба мейкиндигинде кыйраган. Анын ичиндеги 298 адамдын баары набыт болгон.
Эл аралык тергөө тобу учак Орусиядан жашыруун алып келинген ракета менен атып түшүрүлгөн деп бүтүм чыгарган. Расмий Москва буга макул болбой, учакты Украина күчтөрү атып түшүрдү деп айтып келатат.