Ирак аскерлери өлкөнүн экинчи ири шаары Мосулду согушкерлерден бошотуп алганын белгилеп, борбор шаар Багдаддын көчөлөрүн аралап өтүштү.
Премьер-министр Хайдар ал-Абади бир апта мурда 2014-жылдан бери "Ислам мамлекети" террордук тобунун колунда кармалып турган Мосулдагы салгылашууларда экстремисттерди сүрүп чыгарганын расмий түрдө билдирген. Ал бир апталык майрамдоо иш-чараларын жарыялап, Ирактын башка шаарларында да параддар өттү.
Багдаддагы парадга армиянын, элиталык, контртеррордук күчтөрдүн, федералдык полициянын кызматкерлери катышты.
Майрамдоо иш-чаралары Мосулдун батыш жагындагы айрым жерлерде террорчулар менен атышуу дагы эле уланып жатканы тууралуу кабарларга карабастан өттү.