Таласта сууга чөгүп каза тапкандар былтыркыдан эки эсе көбөйдү. Бул тууралуу "Азаттыкка" облустук ички иштер башкармалыгынан билдиришти.
2016-жылдын алты айында сууга агып мерт кеткендер боюнча 6 факт катталган болсо, быйылкы жылдын жарым жылдыгында эле 13 киши сууга агып каза тапты.
Облустук милициянын басма сөз кызматкери Динара Сарногоева:
- Негизги себептери сууга түшөбүз же өтөбүз деп эле агып кетип жатышат. Бүгүнкү күндө Талас облустук милициясынын коомдук коопсуздукту сактоо бөлүмдөрү ушундай кырсыктарды алдын алуу максатында элдин арасында түшүндүрүү иштерин жүргүзүүдө, - деди.
Адам өлүмүнө алып келген окуялар негизинен Таластын Беш-Таш суусу менен Талас дарыясында катталууда. (AlS)