Бишкектин түштүк тарабындагы Арашан айылынан башталган көч Чуңкурчак жайлоосуна чейин уланды. Иш-чарага күбө болуп жүргөн кабарчыбыздын маалыматы боюнча, кыргыз көчүн даңазалаган иш-чарага Маданият, маалымат жана туризм министрлигинен, өкмөт, парламенттен, жарандык коомдон өкүлдөр, туристтер, карапайым тургундар катышууда.
Анда кыргыз көчү менен бирге кыргыздын илгерки салт-санаасын, тарыхын чагылдырган театралдаштырылган оюн-зооктор келген меймандарга тартууланууда.
Уюштуруучулардын белгилөөсү боюнча, "Кыргыз көчү" деп аталган иш-чара Кыргызстанга туристтерди тартууну, кыргыздын байыртан келе жаткан үрп-адат, салт-санаасын жайылтууну жана жаштардын атуулдук сезимин ойготууну максат кылат.(TSh/ZKo)