Жалал-Абад облусунун Базар-Коргон райондук ооруканасында тамак-аштан ууланган 24 адам жатат. Саламаттык сактоо министрлигинин басма сөз кызматы билдиргендей, алардын төртөө балдар. Азыр баарынын абалы туруктуу. 20-21-апрелде он бир адам бейтапканадан чыкты. Бүгүн да чыга тургандар бар.
18-апрелден тарта райондук оорукананын инфекциялык оорулар бөлүмүнө тамак-аштан ууланган 35 адам түшкөн. Райондук ооруканадан "Азаттык" радиосуна билдиришкендей, алар 15-апрелде Правда айылындагы тойдон үйлөрүнө алып кеткен салаттан ууланган.
Республика боюнча быйыл жыл башынан бери тамак-ашка ууланган 31 учур катталып, 64 адам жабыркаган. 2016-жылы тамактан ууланган сегиз адам каза тапкан. (NT)