Соттолгон оппозициячылар Эрнест Карыбеков, Кубанычбек Кадыров жана Бектур Асановдун жубайлары, жакындары, адвокаттар бүгүн, 18-апрелде Бишкекте маалымат жыйын куруп, сот өкүмүнө нааразылык билдиришти. Алар Биринчи Май райондук соту туура эмес жана катаал өкүм чыгарганын белгилешип, анын үстүнөн жогорку инстанцияга кайрыла турганын маалымдашты.
"Бийликти күч менен басып алууга аракет жасаган" деп камакка алынган оппозиция өкүлдөрүнө сот өкүмү 17-апрелде чыккан. Ишти караган Бишкектин Биринчи Май райондук соту Эрнест Карыбековду 20 жылга, Кубанычбек Кадыров менен Бектур Асановду 12 жылга эркинен ажыраткан, Дастан Сарыгуловду төрт жылга шарттуу камаган.
Саясатчылар Бектур Асанов менен Кубанычбек Кадыров былтыр 24-мартта “бийликти күч менен басып алууга” шектелип кармалган. Андан кийин ушундай эле кине менен эксперт Эрнест Карыбеков, ага насаатчы болгон деп коомдук ишмер Дастан Сарыгулов камакка алынган болчу. Саясатчыларды камакка алууга алар бийликти басып алууну уюштурган деген негизде жазылып алынган үндөрдүн жарыяланышы негиз болгон.
Адвокаттар аларды камактан бошотууну, айыптоочу тарап болсо 12-22 жылга чейин эркинен ажыратууну соттон сураган. (NT)