Таласта окуучусун сабады деген мугалимдин иши тергелүүдө. Бүгүн Башкы прокуратурадан кабарлашкандай, окуя быйыл 16-мартта Талас районунун Козучак айылында болгон, мугалим мас абалында 6-класстын окуучусун бир нече жолу башка урган.
Соттук-медициналык экспертизанын жыйынтыгында окуучунун ден соолугуна жеңил залака тийгени аныкталган.
27-мартта райондук прокуратура Кылмыш кодексинин 161-беренесинин негизинде (өспүрүмдү тарбиялоодо милдетти аткарбагандык) кылмыш иш козгогон. Ал облустук милициянын тергөө бөлүмүнө өткөрүлүп берилди.
Кылмышка шектелип жаткан мугалим тараптан бул боюнча азырынча комментарий боло элек. (RK)