Өзбекстандын Фергана шаарындагы “Фергана азот” химиялык заводундагы жарылуудан алты киши мерт болуп, бирөө оор абалда ооруканага түшкөнү ырасталды.
- Аммиак цехинде оңдоо иштери болуп жаткан. Курулмадан аммиак газы сызылып чыгып, ошол жердеги ширетүүчүнүн учкунуна чагылып, чоң жарылуу болгон, - деди акимчилик өкүлдөрүнүн бири.
Кырсык 23-февралда саат 16-30 чамасында болгон. Учурда өкмөттүк иликтөө комиссиясы түзүлдү. Мерт болгондордун жакындарына кенемте төлөп берүү маселеси каралууда.
1958-жылы ачылган «Фергана азот» – Өзбекстандагы азот жер семирткичтерин өндүргөн ири ишкана. Завод жылына 270 миң тонна карбамид жана 350 миң тонна аммиак селитрасын чыгарат.