Шаардык кеңештин бүгүнкүгө белгиленген сессиясына оппозициядагы “Өнүгүү-Прогресс” жана “Ата Журт” фракцияларынын депутаттары катышкан жок. Алар мындай жол менен мурдагы коалициянын бузулушуна нааразылыгын билдирүүдө.
Бүгүнкү жыйында КСДП, “Кыргызстан” жана “Республика - Ата Журт” фракцияларынын депутаттары өздөрүнүн ичинен улуу депутатты сессияны башкаруучу кылып шайлашты.
Жалал-Абад шаардык кеңешиндеги чыр бир айдан бери уланып келатат. Буга чейин шаардык кеңештеги “Өнүгүү-Прогресс”, “Ата Журт” жана “Республика - Ата Журт” фракциялары коалиция түзүп, төраганы шайлоого аракет кылган. Ал учурда Социал-демократтар жана “Кыргызстан” фракциясы сессияга баруудан баш тартышкан. Кийинчерээк “Республика -Ата Журт” фракциясы коалициядан чыкканын жарыялап, азчылыкта калган Социал-демократтар жана “Кыргызстан” фракциялары менен бир альянска бириккен эле. (RsK)