Катардын борбору Доха шаарындагы араб шейхинин үйүндө кыргыз боз үйү тигилди. Бул тууралуу “Азаттык” радиосуна Катарда жүргөн кыргызстандык жаран Азамат Карымшаков билдирди:
- Былтыр Бүткүл дүйнөлүк жаштар федерациясынын негиздөөчүсү Саид Баюми Кыргызстандан Катардын президентинин агасына белек катары боз үй алып барган экен. Биз аны үч күндөн бери тиктик. Боз үй көтөрүп жатканда айрым кыйынчылыктар болду. Бизге Кыргызстандын Катардагы атайын жана толук ыйгарымдуу элчиси Нуран Ниязалиев жардамдашып, боз үйдү туура тиккенди көрсөттү.
Буга чейин элчилик Бишкек-Доха багытында авикаттам ачуу мерчемделип жатканын жана бул аракет эки өлкө ортосундагы экономикалык, маданий карым-катышты жакшыртууга жардам берерин жарыялаган. (BCh)