Референдум жана жергиликтүү кеңештерге шайлоо
Саат сегизден тарта өлкөдө 2 365 шайлоо тилкеси ишин баштады. Чет мамлекеттерде референдум үчүн добуш берүүгө 35 шайлоо участогу ачылган. Андан тышкары Бишкекте кошумча 32 добушкана иштейт, анда башка аймактарда катталып, бирок борбор калаада жашаган шайлоочулар добуш бере алышат.
Жергиликтүү кеңештерге шайлоо жана референдумга көз салуу үчүн 181 эл аралык байкоочу катталды. Алар дүйнөнүн 25 өлкөсүнөн, 46 эл аралык уюмдардан келген байкоочулар. Булардын ичинде ШКУ, КМШ уюмдарынан, элчиликтерден жана башкы консулдуктардан, түрк тилдүү өлкөлөрдүн парламенттик ассамблеясынан, Ислам кызматташтык уюмунун парламенттик биримдигинен, айрым өлкөлөрдүн БШКларынан өкүлдөр бар.
ЕККУ бул жолу шайлоого жана референдумга байкоочу жибербесин маалымдаган.
Жергиликтүү кеңештерге шайлоодо “Таза шайлоо” ассоциациясынын 200дөн ашуун байкоочулары көз салышууда.
Кыргызстандагы бүгүнкү добуш берүү өнөктүгүнө байланыштуу "Бир дүйнө Кыргызстан" укук коргоо кыймылынын юристтери шайлоочуларга кеңеш берүүдө. Бул максатта 5-декабрдан бери 0312 317671, 0778 985271, 0551 961861 номурлары боюнча "түз байланыш" иштеп жатат.
Ошондой эле Мамлекеттик каттоо кызматы ачкан 119 номуру боюнча "түз байланыш" жакшы иштебей жатканына байланыштуу даттануулар болду.
Оштогу шайлоо тилкеси эртең менен жаңы ачылып жаткан кезде.
Бишкек шаарындагы №1022, 1135, 1036 шайлоо участокторунда биометриканы таануучу жабдыктар иштебей, добуш берүүдө маселе жаралууда. Бул тууралуу “Азаттыкка” шаар тургундары кабарлашты. Ак-Өргө жаңы конушунда жайгашкан №1022 шайлоо участогунда добуш берген тургун Тынчтык Алтымышевдин билдиришинче, жабдыктар иштебей калып, жарандар добуш бере албай жатат.
-Добуш берүүгө келген адамдардын бармагын тааныбай, жабдыктар иштебей калып жатат. Муну шайлоо комиссиясындагылар электр жарыгынын кубаттуулугу жетпей жатат деп түшүндүрүшүүдө, - деди Алтымышев.
Ушундай эле маселелер жаралып жатканын “Кыргызстан” партиясынын өкүлү Константин Конкин да тастыктады.
Референдумга каршы парламентте да, эл арасында да принципиалдуу каршылык болгон жок. Бул тууралуу бүгүн добуш бергенден кийин журналисттердин суроолоруна жооп берип жатып Жогорку Кеңеш төрагасы Чыныбай Турсунбеков билдирди.
Спикердин белгилешинче, Конституцияга өзгөртүү киргизүү маселеси парламентте талкууланганда ага өзгөртүү жана толуктоо боюнча "депутаттар орчундуу каршылык билдирген жок, суроолор процедуралык гана мүнөздө болгон".
Премьер-министр Сооронбай Жээнбеков бүгүн, 11-декабрда, Президеннттин алдындагы Башкаруу академиясында жайгашкан № 1266-шайлоо участкасында Конституцияга өзгөртүүлөрдү киргизүү боюнча референдумда добуш берди.
“Жаңы муун” кыймылы референдумга каршы добуш берүүгө чакырууда. Оппозициялык маанайдагы саясий кыймыл тараткан билдирүүдө буга чейин Баш мыйзам бийликтин аракети менен тогуз жолу өзгөргөнүн белгилеп, мындан өлкөдө экономикалык өсүш болуп кетпегени айтылган.
Шайлоо тилкеси.
Премьер-минис Сооронбай Жээнбеков добуш берүүдө.
Ден соолугуна байланыштуу шайлоо тилкесине келе албагандар үчүн көчмө добуш берүү уюштурулду. 10-декабрда алдын ала үйүнөн добуш берип жаткан улгайган аял. Беш-Күнгөй айылы, Чүй облусу. 10-декабрь,
Үйүнөн добуш берип жактан аял. Беш-Күнгөй айылы, Чүй облусу. 10-декабрь,
Добуш берип жаткан аял.
Айрым шайлоо тилкелеринде электрондук үкөктөр иштебей калган учурлар болду.
Электрондук үкөк.
Добуш берүү учуру.
Шайлоо тилкеси.
Укук коргоочу Рита Карасартова сүрөттөгү студенттерди Медициналык академиядагы кошумча тилкеге алып бара жатканын Фейсбуктагы баракчасына жазды.
Студенттерди алып бара жаткан дагы бир сүрөт.
Жусуп Баласагын атындагы улуттук университеттеги 1060 шайлоо тилкесиндеги көрүнүш. Баары добуш берүүнү күтүп жатат. Рита Карасартованын сүрөтү.