Бишкекте 11-октябрда эл аралык Кыздар күнү белгиленет. Анын алкагында “Балдар укугун коргоо” коомдук бирикмеси жеткинчектердин укугуна арналган эсселерге сынак жарыялайт. Андан тышкары, тренинг, спорт мелдештери, театрлаштырылган форумдар өтөт. Иш-чаралар фотокөргөзмө, флешмобдор менен коштолорун аталган коомдук бирикме кабарлады.
Эл аралык Кыздар күнүн белгилөө 2012-жылы Канаданын демилгеси менен Бириккен улуттар уюмунун Башкы ассамблеясында бекитилген.
Укук коргоочулар кыздар көп учурда үй-бүлөдөгү зомбулукка кабылып, зордуктоолорго, сексуалдык кулчулукка дуушар болорун айтып келишет.