Аксынын Үңкүр-Тоо аймагына өзбек чек арачылары зымдан тосмо тартып жатканы тууралуу маалымат чындыкка жатпайт. Бул тууралуу Өкмөттүн облустагы ыйгарым укуктуу өкүлүнүн биринчи орун басары Мамасалы Акматов “Азаттык” радиосуна билдирип, 3-сентябрда аталган аймакка барып келгенин, бирок телемунарага чейин жетпегенин айтты:
- Үңкүр-Тоонун айланасына зым тартылып жатканы тууралуу эл арасында сөз болуп кетти. Ошондуктан чек ара кызматынын өкүлү менен чогуу барып келдим. Эч кандай зым тартылган жок. Станция иштеп жатат.
Мурдараак Үңкүр-Тоого Өзбекстан зым тосмо тартып жатканы кабар чыккан.
Үңкүр-Тоого Өзбекстан 22-августта күч кызматкерлерин алып кирген. Ал жердеги телемунарада иштеген төрт кызматкерди кармап кетишкен. Андан бери алар Наманган облусунун Жаңы-Коргон райондук милициясында камакта. Коңшу өлкө муну “алар Өзбекстандын аймагында мыйзамсыз жүргөнү үчүн кармалышты” деп түшүндүргөн. Үнкүр-Тоодогу өзбек тартип сакчылары чыгып кетише элек.
Президент Алмазбек Атамбаев маселени тынчтык жол менен чечүүнү тийиштүү органдарга тапшырган. (RsK\SE)