Орусия президенти Владимир Путин Батыштан ташылган азык-түлүккө эмбаргону 2017-жылдын соңуна чейин узартты. 2014-жылдын 7-августунда Украинанын чыгышындагы саясатка байланыштуу Орусия өзүнө жарыяланган санкцияларга жооп иретинде АКШ, Канада, Австралия, Норвегия жана Евробиримдик өлкөлөрүнүн продукцияларын ташууга чектөө киргизген.
Ага ылайык, аталган мамлекеттерден жер-жемиш, сүт жана эт азыктары келбей калган. Крымды аннексиялап, Украинанын чыгышындагы козголоңчуларды колдогондугу үчүн Батыш өлкөлөрү да Орусияга бир нече жолу санкция жарыялаган.