Түркиянын Стамбул шаарындагы 11 адамдын өмүрүн алган жардыруу үчүн жоопкерчиликти күрт жикчилдери алды. Түркияда тыюу салынган Күрт жумушчу партиясынан бөлүнгөн “Күрдистан шумкарлары” аттуу куралдуу топтун согушкерлери 7-июндагы жардырууну ишке ашырганын билдиришти.
Стамбулдун эл көп жүргөн районундагы полициянын автобусу өтүп бараткан чакта дүрмөттөлгөн автобус жардырылган эле. Андан 11 адам мерт болуп, 40га жакыны жараат алган. Түрк бийликтери 7-июнда Стамбулда полиция автобусун жардырууга Күрт жумушчу партиясынын тиешеси бардыгына далилдер табылганын билдирүүдө.