Ошто Үркүндүн 100 жылдыгана арналган спектакль даярдалууда. Бул тууралуу быйылкы “Тарых жана маданият жылын” өткөрүү дирекциясынан кабарлашты. “Кыргын” деп аталган спектакль облустук драма театрынын сахнасында коюлат. Анда 1916-жылкы окуянын чыгыш себептери баяндалат.
Ошондой эле быйыл Ошто «Жаңыл мырза» спектакли көрсөтүлгөнү жатат.
Үркүндүн 100 жылдыгын белгилөө максатында былтыр 27-майда президент Алмазбек Атамбаевдин жарлыгы менен курамына тарыхчы окумуштуулар жана башка гуманитардык илимдердин өкүлдөрү кирген топ түзүлгөн. Анда "кыргыз калкынын тарыхындагы эң трагедиялуу окуяга тарыхый баа берүү" сунушталган.
1916-жылы Кыргызстандын эгемендиги үчүн улуттук-боштондук көтөрүлүш кандуу басылган соң орус падышачылыгынын жазалоочу кошуундарынын мыкаачылыгынан Нарын, Чүй жана Ысык-Көлдөгү кыргыздардын көпчүлүгү Кытай тарапка качууга аргасыз болгон. Айрым тарыхчылардын айтымында, бул кайгылуу окуялардан улам аймактагы кыргыздардын калк саны дээрлик 40% азайган.
Совет учурунда, өзгөчө 1950-80-жылдары, көтөрүлүш жана Үркүн тууралуу чыныгы маалыматты жашыруу саясаты жүргүзүлүп, бул окуяларга объективдүү баа берилген эмес. (RK)