Ооганстандын президенти Ашраф Гани "Ислам мамлекети" экстремисттик тобу Ооганстандын аймагында ири жоготууларга кириптер болуп, анын ичинде 150 согушкеринен айрылганын белгиледи. Гани бул тууралуу 12-февралда Мюнхендеги коопсуздук боюнча жылдык конференцияда сүйлөп жатып билдирди. Анын айтымында, өлкө чыгышында аталган экстремисттик топтун радиостанциясы да кыйратылып, үнү өчүрүлгөн.
АКШ жана ооган расмийлери 1-февралда экстремисстик топтун "Халифат үнү" деп аталган радиосу Пакистан чек арасына жакын аймактагы аба соккуларынан кыйратылганын билдиришкен эле. Бул радио Ооганстандын чыгышындагы Нангархар провинциясында 2015-жылдын соңунан тарта уктурула баштаган болчу.